الحمد الله تعالجت من الاكزيما التأتبية

السلام عليكم

طبعا هذا اول موضوع لي بالمنتدى وحابة افيد الناس من واقع تجربتي المريرة مع الاكزيما التأتبية

ولها اسم ثاني .. التهاب الجلد التماسي او شي جذي تقريباً

والحمد الله لقيت حل وتعالجت منها

طبعا الاكزيما بشكل عام مالها اسباب معينة حتى الانسان يقدر يتجنبها

وانا بكتب موضوع كامل متكامل على شان يكون مرجع لكل شخص يبحث بالانترنت على شان الكل يستفيد

خل ابدأ وياكم بالاعراض

1- احمرار بالجلد

2- حكة قوية تمنعك من النوم

3- جروح بسبب الحكة

4- سهر تعب بسبب قلة النوم (تخلي الواحد يواصل 4 ايام من غير نوم )

5- التهاب وتهيج الجلد

6- صعوبة الجلوس على السجاد / الاريكة / الفراش ... حيث يتهيج الجلد وتزداد الحكة

وطبعا ما خليت طبيب ما رحتله .. حكومي / خاص / عيادات جلدية

للأسف ضيعت وقتي وفلوسي على الفاضي

ومسكت معاي سنتين ... سنتين ماني قادرة انام عدل

سنتين عايشة على حبوب مضادات الحساسية والحكة .. الي اسمها مضاد الهيستامين

طبعا هالحبوب ما تسوي شي بس تسبب نعاس وتنوم

تقعدين ثاني يوم ولا جسمج كله شاب عليج ومتهيج والحكة تذبحج وتخليج تكرهين نفسج

طبعا خلونا نشوف ابداعات الدكاترة وشوفوا شنو اوصفولي من ادوية

الفاكورت - Alfacort

كريم يوراكس Eurax

رابيد ريليف rapid skin relief cream

فيوسيكورت Fucicort

شفتوا هالادوية ؟

كلها فااااااااااااااااااشـــلة

وغالية عمى بعينهم

المشكلة اني ما شفت تحسن حتى لو 1%

النتيجة كانت مضيعة للوقت والفلوس

مادري ليش اي واحد تحوشه اكزيما يقعدون يوصفون له هالادوية الفاشلة .. المشكلة فيها كورتيزون .. معروف ان اضراره اكثر من منافعه

وطبعا بعد المعاناة والتعب والهم والغم .. الحمد الله لقيت علاج وتعالجت

طبعاً العلاج بسيط وسهل وخلال 3 ايام تنتهي معاناة الاكزيما

ورخيص حيل ماراح تصرفين الا 3 دنانير ونص

العلاج هو ثلاث اشياء بسيطة وسهلة .. وهو كالتالي :

1- دابر هيربولين

كريم مثل الفازلين بخلاصة الـ الو فيرا وفيتامين اي E

تدهنين فيه اماكن الاصابات والي فيها حكة مرتين باليوم

الالو فيرا هو نوع من انواع الصبار

لو تسوون بحث بسيط عن بقوقل راح تشوفون فوايدة الي ما تخلص

وهذي صورة الكريم

وهذي فوايد الالو فيرا

الألو فيرا للعناية بالبشرة

يساعد الالوفيرا على علاج العديد من الأمراض الجلدية مثل:

القروح الناتجة عن البرد

الإكزيما

لدغات و لسعات الحشرات ( بق الفراش / الناموس / العث )

الجروح والندبات

التهابات الجلد

الحروق

2- كبسولات زيت السمك اوميغا 3 6 9

طبعا غنية عن التعريف .. ومفيدة لكل شي بالجسم شعر / جلد / اظافر وكل شي

ترطب وتعزز الجلد وتعالج الاكزيما

ثلاث كبسولات باليوم .. واستشيري الصيدلي افضل

3- شرب 8 قلاصات ماي على مختلف فترات اليوم

فوائد الماي عظيمة حتى لو مافي شي لازم تشربين ماي

قلاصين الصبح .. قلاصين الظهر .. قلاصين العصر .. قلاصين بليل

وخلاااااص .. بإذن الله راح تودعين الحكة والاكزيما للأبد

طبعا هالعلاج ان شاء الله متأكدة منها لاني مو قاريه ولا سامعه من احد لا لا لا .. هالاشياء انا مجربتها بنفسي

طبعا العلاج هذا لقيته بالصدفة من الصيدلانية الي عطتني العلاج وانا رايحة اشتري حبوب الحكة على شان اقدر انام عسى الله يرزقها الجنة يارب .. انقذت حياتي

وما حبيت ابخل عليكم وحبيت افيد واستفيد

بس فيه شوية تنبيهات وملاحظات

1- استمروا على العلاج لمدة اسبوعين على شان تتعالجون 100%

طبعا العلاج من اول يوم راح تحسين براحة مو طبيعية وثاني وثالث يوم لا اكزيما بعد اليوم

2- لا تتسبحون اول ثلاث ايام على شان لا يروح مفعول الكريم

3- حاولوا تبتعدون عن الاشياء الي تهيج الجلد اول ثلاث ايام

4- الماء ضرووووووري .. لازم تشربين ماي لازم لازم لازم .. فوايد الماي ما تخلص واهي اهم خطوة لعلاج الاكزيما

5- استعملوا مرطبات الجسم بعد السبوح .. ترطيب الجلد اهم شي

وبس خلصنا

والله يشافي الجميع وموفقين يارب

التعديل الأخير تم بواسطة مـــريم 1990 ; اليوم الساعة 06:59:00 PM.

via منتديات كويتيات النسائية http://www.q8yat.com/t1148954.html